تحدث المخرج عمرو سلامة عن الفنانين وضعف أجورهم وكيف يغدر الفن واحيانا يصل بهم إلى الديون والاستلاف وذلك خلال منشور نشره عبر حسابه الرسمي بموقع التواصل الاجتماعي فيسبوك بعد وفاة الفنان سليمان عيد.

عمرو سلامة: الفنانين أجورهم ضعيفة و10% بس اللي بياخدوا فلوس كويسة

وقال عمرو سلامة في منشوره الذي رصده موقع تحيا مصر منذ قليل: في ثلاث ممثلين راحلين من نجوم الصف الثاني كان حظي حلو اني اشتغلت معاهم قبل وفاتهم، وكنت من عشاقهم، ولما دردشنا وفتحنا قلبنا لبعض اكتشفت انهم مش مستريحين ماديا، وبيشتكوا من ضعف اجورهم، وانهم في الأغلب بيقبضوا باليوم، واحد فيهم مات من سنين وكان محتاج عملية مهمة في عينه وماكانش معاه فلوس لان حتى بعض أجوره مش عارف يحصلها، وكان محرج يطلب من حد مساعدة، والشخص ده بالذات أنا كنت شايفه من رموز الكوميديا والنقاش ده حصل بنا قبل وفاته بشهور قليلة جدا.

وتابع عمرو سلامة حديثه: الناس عندها انطباع ان كل الفنانين اجورهم كبيرة واستفزازية، لكن الواقع ان اللي بياخذوا اجور كبيرة هم ١٠٪؜ فقط من العاملين في الصناعة ديه، ٩٠٪؜ من العاملين أجورهم بالنسبة لمجهودهم تعتبر مش كبيرة بالمقارنة بمهن ثانية كثير مافيش عليها نفس تسليط الضوء.

عمرو سلامة: الفنانين معندهمش تأمين صحي ولا قدرة يشتكوا من طول ساعات العمل 

وأضاف عمرو سلامة: غير بقى إن معظم طاقم العمل من فنيين وعمال وضعهم أصعب، ولا عندهم تأمين صحي ولا عندهم قدرة حتى يشتكوا من طول ساعات عمل ومعاملة السخرة وتأخير أجور وأحيانا نصب واحتيال لإنهم بيشتغلوا من غير عقود.

واستكمل حديثه: صديق عزيز فنان قريب كنا بنحكي مع بعض عن قصص شبه ديه، وعن فنانين كمان كانت نجوم ودلوقتي بيستلفوا، وقالي جملة رنت في ودني: "الشغلانة ديه غدارة"، وهي فعلا غدارة، والكلام ده ليس لاستدرار عطف او شفقة، لكن لتصدير صورة واقعية لجمهور عريض شايف الشغلانة هلس وحرام ورفاهية ولهو، وديه قناعات يمكن صعب تغييرها لإنها متناسقة مع نظرة محافظة ما، لكن وكمان باصص بغضب لناس فاكر إن كلهم الدنيا بتمطر عليهم فلوس، لكن في الحقيقة غالبيتهم بيعانوا، يمكن ساعات أكثر منهم بكثير.

عمرو سلامة ومسلسل برستيج 

من ناحية أخرى، ينتظر المخرج عمرو سلامة عرض مسلسل برستيج والذي من المقرر عرضه في 24 من شهر ابريل الجاري على منصة يانجو بلاي وهو من بطولة النجوم مصطفى غريب، محمد عبد الرحمن، دينا، بسام رجب، وسامي مغاوري.